ಕಲಿಯುಗದ ಕುಡಕನ ಲವ್ಹ್ ಕಹಾನಿ 

ಕಲಿಯುಗದ ಕುಡಕನ ಲವ್ಹ್ ಕಹಾನಿ 

ಕೊಡತಗೇರಿ ಎಕ್ಸಪ್ರೆಸ್ ಡಿಜಿಟಲ್ ಹೌಸ್

ಕಲಿಯುಗದ ಕುಡುಕ ಅಂತಲೇ ಉತ್ತರ ಕರ್ನಾಟಕದ ಜನಮಾನಸದಲ್ಲಿ ಹಾಸ್ಯದ ಬೇರೂರಿದ್ದ ರಂಗಕರ್ಮಿ ರಾಜು ತಾಳಿಕೋಟಿ ಈಗ ಕಾಮಿಡಿ ದೋಣಿಯಲ್ಲಿ ಮುಳುಗಿ ಮರೆಯಾಗಿದ್ದಾರೆ. ರಂಗಭೂಮಿಯಲ್ಲಿ ತಮ್ಮನ್ನು ತಾವು ತೊಡಗಿಸಿಕೊಂಡು ಕಲೆಯನ್ನೇ ಜೀವವಾಗಿಸಿಕೊಂಡಿದ್ದ ರಾಜು ತಾಳಿಕೋಟೆ 59 ವಯಸ್ಸಿಗೆ ಬಾರದೂರಿಗೆ ಪಯಣಿಸಿದ್ದಾರೆ. ಆದರೆ ರಾಜು ತಾಳಿಕೋಟೆ ಬದುಕೇ ಒಂದು ಅದ್ಭುತ ಪ್ರೇಮ ಕಾವ್ಯ. ಇಬ್ಬರ ಹೆಂಡಿರ ಮುದ್ದಿನ ಗಂಡನಾಗಿ, ಹಾಸ್ಯ ಕಲಾವಿದನಾಗಿ ಮಿಂಚಿದ ಅವರ ಜೀವನ ಇತಿಹಾಸದ ಪುಟದಲ್ಲಿ ಅಚ್ಚಳಿಯದೆ ಉಳಿಯುವಂಥದ್ದು.ರಾಜು ತಾಳಿಕೋಟೆಗೆ ಹೃದಯಾಘಾತ ಸಂಭವಿಸಿತ್ತು. ಉಡುಪಿಯ ಮಣಿಪಾಲ್‌ ಆಸ್ಪತ್ರೆಯಲ್ಲಿ ಚಿಕಿತ್ಸೆ ನೀಡಲಾಗ್ತಿತ್ತು. ಆದರೆ ನಿನ್ನೆ ಚಿಕಿತ್ಸೆ ಫಲಿಸದೇ ರಾಜು ತಾಳಿಕೋಟೆ ಇಹಲೋಕ ತ್ಯಜಿಸಿದ್ದಾರೆ. ಚಿತ್ರರಂಗದ ಗಣ್ಯರು, ರಾಜಕಾರಣಿಗಳು, ಲಕ್ಷಾಂತರ ಅಭಿಮಾನಿಗಳು ಕಂಬನಿ ಮಿಡಿಯುತ್ತಿದ್ದಾರೆ. ಇಂಥಾ ಹೊತ್ತಿನಲ್ಲಿ ರಾಜು ತಾಳಿಕೋಟೆ ಅವರ ವೈಯಕ್ತಿಕ ಬದುಕಿನ ಸಂಗತಿಗಳು ಗಮನ ಸೆಳೆಯುತ್ತಿವೆ. ಇಬ್ಬರ ಹೆಂಡಿರ ಮುಂದಿನ ಗಂಡನಾಗಿದ್ದ ರಾಜು ತಾಳಿಕೋಟೆ ಇಬ್ಬರ ಜೊತೆಗೂ ಅನ್ಯೋನ್ಯವಾಗಿದ್ದರು. ಇನ್ನೊಂದು ಇಂಟರೆಸ್ಟಿಂಗ್‌ ವಿಚಾರ ಅಂದ್ರೆ ಇಬ್ಬರು ಹೆಂಡಿರ ಹೆಸರೂ ಒಂದೇ ಅನ್ನೋದು.
ಇಷ್ಟಕ್ಕೂ ರಾಜು ತಾಳಿಕೋಟೆ ಅವರ ಊರು ಚಿಕ್ಕಸಿಂದಗಿ. ವಿಜಯಪುರ ಜಿಲ್ಲೆಯ ಸಿಂದಗಿ ತಾಲೂಕಿನಲ್ಲಿದೆ. ಈಗಿನ ಕಾಲದಲ್ಲಿ ಒಬ್ಬರನ್ನೇ ಮದುವೆ ಮಾಡಿಕೊಂಡು ಸಂಸಾರ ನಡೆಸೋದು ಕಷ್ಟ. ಅಂತಹದರಲ್ಲಿ ರಾಜು ತಾಳಿಕೋಟೆ ಇಬ್ಬರನ್ನು ಮದುವೆ ಆಗಿ ಜೀವನ ನಡೆಸುತ್ತಿದ್ರು. ರಾಜು ತಾಳಿಕೋಟೆ ಮೊದಲು ಬಾಲ್ಯ ವಿವಾಹ ಆಗಿದ್ದರು. ನಂತರ ಮತ್ತೊಬ್ಬರನ್ನು ಮದುವೆಯಾಗಿದ್ದು, ಇಬ್ಬರ ಜೊತೆಗೂ ರಾಜು ಅನ್ಯೋನ್ಯವಾಗಿಯೇ ಸಂಸಾರ ನಡೆಸ್ತಿದ್ರು. ಅಚ್ಚರಿ ಅಂದ್ರೆ ಇಬ್ಬರು ಹೆಂಡ್ತಿರ ಹೆಸರೂ ಪ್ರೇಮಾ.. ಇಬ್ಬರು ಪ್ರೇಮಾ ಕೂಡ ಅನ್ಯೋನ್ಯವಾಗಿದ್ದರು ಅನ್ನೋದು ಗಮನಾರ್ಹ ಸಂಗತಿ. ರಾಜು ತಾಳಿಕೋಟೆ ಅವರದ್ದು ತುಂಬಿದ ಕುಟುಂಬ. ಮೊದಲ ಪತ್ನಿ ಪ್ರೇಮಾ ತಾಳಿಕೋಟೆ ಅವರಿಗೆ 2 ಗಂಡು ಒಂದು ಹೆಣ್ಣು ಮಗಳಿದ್ದಾಳೆ. ಭರತರಾಜ್ ಮತ್ತು ದಾವಲ್ ಪುತ್ರರು. ಹೀನಾ ಪುತ್ರಿ. ಹಾಗೆಯೇ ಎರಡನೇ ಪತ್ನಿ ಪ್ರೇಮಾ ಸಿಂಧನೂರು ಅವರಿಗೆ ಇಬ್ಬರು ಹೆಣ್ಣು ಮಕ್ಕಳಿದ್ದಾರೆ. ಅವರ ಹೆಸರು ಶಾಜೀದಾ ಹಾಗೂ ಶಬ್ಬು.. ಮಜಾ ಅಂದ್ರೆ ಇವರ ಮೊಮ್ಮಗನಿಗೂ, ಇವರ ಮಗನಿಗೆ ಒಂದು ವಾರವಷ್ಟೇ ವ್ಯತ್ಯಾಸ. ಇದನ್ನು ರಾಜು ತಾಳಿಕೋಟೆ ಬಿಗ್ ಬಾಸ್ ವೇದಿಕೆ ಮೇಲೆ ತಮ್ಮ ಫ್ಯಾಮಿಲಿ ಪರಿಚಯ ಮಾಡಿಕೊಡುವಾಗ ಬಹಿರಂಗಪಡಿಸಿದ್ದರು. ಈ ವಿಚಾರ ಕೇಳಿದ ಸುದೀಪ್ ಶಾಕ್‌ ಆಗಿದ್ದರು..

ರಾಜು ತಾಳಿಕೋಟೆಯವರ ಮೂಲ ಹೆಸರು ರಾಜೇಸಾಬ ಮಕ್ತುಮಸಾಬ್ ತಾಳಿಕೋಟೆ. ರಂಗಭೂಮಿ ಕಲಾವಿದನಾಗಿ ಮಿಂಚು ಹರಿಸಿದ್ದ ರಾಜು ತಾಳಿಕೋಟೆ, ಕಲಿಯುಗದ ಕುಡುಕ, ಕುಡುಕರ ಸಾಮ್ರಾಜ್ಯ, ಮತ್ತು ಅಸಲಿ ಕುಡುಕ ನಾಟಕಗಳು ಹೆಚ್ಚು ಖ್ಯಾತಿ ಗಳಿಸಿವೆ. ಈ ನಾಟಕಗಳ ಆಡಿಯೋ ಕ್ಯಾಸೆಟ್‌ಗಳು ಕೂಡ ಆ ಕಾಲದಲ್ಲಿ ಉತ್ತರ ಕರ್ನಾಟಕ ಭಾಗದಲ್ಲಿ ಭಾರಿ ಸಂಚಲನ ಸೃಷ್ಟಿಸಿದ್ವು.. ಕೇವಲ ನಟನಾಗಿರದೆ, ತಾಳಿಕೋಟಿಯ ಪ್ರಸಿದ್ಧ ಖಾಸ್ಗತೇಶ್ವರ ನಾಟಕ ಮಂಡಳಿಯ ಮಾಲೀಕರೂ ಆಗಿದ್ದರು. ಅವರ ಜೀವನದ ಬಹುಪಾಲು ಸಮಯವನ್ನು ಅವರು ಉತ್ತರ ಕರ್ನಾಟಕದ ಹಳ್ಳಿಗಳಲ್ಲಿ ನಾಟಕಗಳ ಮೂಲಕ ಜನರನ್ನು ರಂಜಿಸುವುದರಲ್ಲಿಯೇ ಕಳೆದಿದ್ದರು. ರಂಗಭೂಮಿಯಲ್ಲಿ ಅಪಾರ ಅನುಭವದ ನಂತರ ರಾಜು ತಾಳಿಕೋಟೆ ಕನ್ನಡಚಿತ್ರ ರಂಗಕ್ಕೆ ಪ್ರವೇಶಿಸಿದರು. ನಿರ್ದೇಶಕ ಯೋಗರಾಜ್ ಭಟ್ ಅವರ ಮನಸಾರೆ ಚಿತ್ರದ ಮೂಲಕ ಗಮನ ಸೆಳೆದರು. ನಂತರ ಪಂಚರಂಗಿ, ಮತ್ತೊಂದ್ ಮದುವೇನಾ ಹಾಗೂ ಮೈನಾ ಸೇರಿದಂತೆ ಹಲವು ಚಿತ್ರಗಳಲ್ಲಿ ನಟಿಸಿ ಪ್ರೇಕ್ಷರನ್ನು ರಂಜಿಸಿದ್ದರು. ಅವರ ನಟನೆ, ಮಾತಿನ ಶೈಲಿಗೆ ಲಕ್ಷಾಂತರ ಮಂದಿ ಅಭಿಮಾನಿಗಳು ನಗುವಿನ ದೋಣಿಯಲ್ಲಿ ತೇಲಾಡಿದ್ರು. ಆದ್ರೀಗ ಇಷ್ಟೊಂದು ಹಾಸ್ಯ ಪ್ರಜ್ಞೆ ಮೂಡಿಸಿದ್ದ ರಾಜು ತಾಳಿಕೋಟೆ ಬಾರದೂರಿಗೆ ಪಯಣಿಸಿದ್ದು, ಕುಟುಂಬಸ್ಥರು, ಆಪ್ತರಿಗೆ ಬರಸಿಡಿಲೇ ಬಡಿದಂತಾಗಿದೆ.